هلوسات مبتذلة

.. خرجت من الشركة لمدة عشر دقائق ثم عدت…. ، عندما وصلت للشركة كنت احاول ان اجد مكان اوقف فيه السيارة ووقفت خلف سيارة لفتت نظري فورا فهي غريبة عن المنطقة ، سيارة اوبل ستيشن وعلى الزجاج الخلفي شعار النسر وبداخلها شبك حديد يفصل بين المقعدين الامامي والخلفي .. يا سلام  سيارة امنية !!، وبما ان الحس الامني عندي مرتفع انتبهت ايضا لسيارة اخرى غريبة ايضا والزجاج كله فيميه !، ارتفع الحس الامني اكثر ونظرت بالاتجاه الاخر لأرى 3 رجال يقفون امام باب الشركة !!… يا حبيبي اكلنا هوا

نظر احدهم لي واشار باصبعه تجاهي .. عندها لم اتردد لحظة واحدة، حركت السيارة وانطلقت فورا على مبدأ اللي يحب النبي يخلي وعلى مبدأ يا روح ما بعدك روح وعلى مبدأ لا تموت لحتى يجيك الموت ، ولاني مواطن عادي فهذه مبادئ يجب علي ان احفظها جيدا واعمل بها عند الاستشعار بأي خطر ،

من انا حتى اغامر واقترب منهم !!..لست مواطن لايت ولا مواطن اكسترا وليس لدي Big Eggs

عندما انطلقت بالسيارة رأيت احدهم يحاول ان يلحق بي وبدأ يلوّح بيده لي فبدأت (الانا) عندي تردد اجاك الموت يا تارك الصلاة، وبدأت افكر .. لماذا ؟ ليش ؟ شو فيه ؟ ، واضح انهم ينتظرون احد ما ؟، كيف عرفوني وانا ما زلت في السيارة ؟؟، اكيد جايين لعندي !! ،

انا شو عملت !!… ، بعمري ما حكيت بصوت عالي ولا بعمري خالفت القانون ..يعني مافي الا شغلة وحدة بس .. قصة التدوين هي اللي من جديد علقت فيها !

تذكرت اني منذ قليل كتبت تعليق باحد المدونات المحجوبة .. بس ما غلطت بالحكي !!..، يا لطيف شو سريعين واكيد زعلوا لانو اخدت وعطيت مع واحد مغضوب عليه !!،، مممم  او يمكن بسبب اخر تدوينة كتبتها ! ، والله الشغلة يعني مافيها مزح الشباب الطيبة مو تاركين حرف يمر بدون ما يراقبوه !، او يمكن شي حدى خلعني هداك التقرير من كعب الدست من ورا هالمدونة الزفت ..، يعني مو معقولة جايين لعندي لاني عم العب بساعة الكهربا ولا جايين لعندي لاني لغاية الان ما استلمت شيكات المازوت….،احتمال زعلوا لاني امبارح تخانقت مع رئيس لجنة توزيع الشيكات وقلت له “خـ*** عليك وعلى شيكاتك” ، ..طيب معقولة سمعوني وانا عم احكي عالموبايل وكنت عم اسأل عن صديق لي موقوف على ذمة التحقيق بأحد فروع البيتزا هت !!،

رن الموبايل ..رقم غريب  اكلنا هوا ..!!، وبما اني ابتعدت بما فيه الكفاية رديت عالموبايل .. بدأ كلامه فورا : انا واقف عالباب ..وين هربت يا عامر .. (وبيعرف اسمي كمان! )

- مين معي ؟

- انا ابوغيث ناطرك ومعي الشباب عاوزينك بموضوع ضروري

سكرت الخط فورا..

قلت لنفسي (اكلنا هوا .. بكرا عمر تبع المينا  بيحط اسمي بالقائمة تبعتو كمان)

رجع اتصل مرة تانية .. تشجعت ورديت عليه:

- ابوغيث مين؟  وموضوع شو؟

- ما عرفتني!..انا ابوغيث اخوه لجارك ابومحمد ومعي ولاد عمي .. وبلش يحكي ويحكي وانا في وادي وهو في وادي اخر، .. اللي فهمته بعدين ان سيارته الاوبل حاطط لها شبك وشعار النسر مشان تصير متل السيارات الامنية والناس تخاف منو !، وجاي لعندي على امل يلاقي شي وظيفة لأولاد عمه !