هلوسات مبتذلة

هذه الاحداث وقعت بين عام 1993 والعام 2005

في تلك الايام .. كانت الـ 25 ليرة لها عزّ

ابو صطيف.. خلينا نعتبر ان هذا اسمه
ابو صطيف صديقنا كان كسول وبليد وغبي نوعا ما.. بيد انه رسب مرتين في الصف السابع والثامن
ابو صطيف طبعا فيما بعد وصل للصف التاسع (الكفاءة) ولم ينجح بالامتحان النهائي..وترك المدسة

ابو صطيف مثله مثل باقي الشباب في قريته امامه احد طريقين … اما ان يبقى في القرية ويعمل في الزراعة او محاولة ايجاد وظيفة في الدولة تؤمن له حياته ، ووظيفة الدولة هي امان للمستقبل كما كان يقول له والده..

ابو صطيف انتسب لكلية الشرطة ليصبح شرطي مرور يقف يوميا عند احد اشارات المرور لينظم السير…

وعلى ذمة الرواي وهو نفسه ابوصطيف… كان ابو صطيف يتذكر وصية امه له ان لا يمد يده للحرام ولا يتقاضى اي رشوة فهي مال حرام …

بعد 3 سنوات…
ابو صطيف قرر يتزوج… ، ولكن تفاجأ ان الزواج مصاريفه كبيرة وراتبه يشكل نسبة ضئيلة جدا من مجموع مصاريف الزواج

ابو صطيف .. قرر يتخلى عن وصيه امه بعدم قبول الرشوة..
ابو صطيف .. بدأ يتعلم شوية شوية… 25 ورا 25 ورا 25

بعد سنتين…
ابو صطيف جمع مبلغ محترم من راتبه ومن الـ 25 اللي كان ياخذها من السائقين المخالفين..

ابو صطيف .. تزوج ….
ابو صطيف كان حالف يمين بس يتزوج ما بقى يمد يده للحرام او الرشوة لانو ما بدو يطعمي زوجته واولاده من مال حرام

بعد شهر…
ابو صطيف رجع يبلع.. وياخذ رشوة واكراميات .. لانو تعود وصارت الشغلة متل الحشيش مابقى فيه يتوقف عن تقاضي الرشوة .. لانه راتبه صار يخلص بنص الشهر…

بعد اسبوع…
ابوصطيف تعرف على احد الضباط وصار بينهم علاقة صداقة.. واتفقوا….
ابوصطيف قال له الضابط: راح حطك عند اشارة مرتبة والمخالفات عليها كتيرة.. وبالنص شو رأيك؟

ابو صطيف وافق… وصار كل يوم يمر عليه الضابط قبل نهاية الدوام ويقبض 500 ليرة من ابو صطيف

بعد 3 اشهر …
ابو صطيف صار عنده دخل لا بأس به كل شهر وصار وضعه احسن وبالعلامة اشترى غسالة جديدة ..توماتيك

بعد 3 اشهر كمان…
ابو صطيف اعترف ذات مرة لي  وقال: (المصاري بتشغل العقل) وصار يفكر كيف يزيد دخله من الرشاوي
ابو صطيف طلب من الضابط انو ينقله الى احد المواقع الاستراتيجة (بالنسبة للرشوة) ودفع مقابل ذلك 20 الف ليرة سورية

ابو صطيف انتقل الى احد الاماكن التي تقف فيها (ميركوباص)سرافيس نقل الركاب بكثرة
ابو صطيف صار يتقاضى كل يوم عن كل سرفس على الخط مبلغ 10 ليرات (مبلغ بسيط جدا(
ابو صطيف عمل احصائية وجد انه في 400 سرفيس على الخط ولنفرض انه خط (الدائري الشمالي)
ويوميا على اقل تقدير في 200 سرفيس موجودين على الخط

ابو صطيف حسبها بسرعة  (مع انه كان غبي بالحساب) 200 سرفيس × 10 ليراتيعني فيها 2000 ليرة كل يوم يخصم منها 500 ليرة يوميا لصديقه الضابط حتى يحميه وينقله كل فترة الى مكان اخر دسم حتى لا يكشف امره..وهيك ابو صطيف دخله الشهري صار بحدود 45 الف ليرة اضافة لراتبه

بعد 3 سنوات…
ابوصطيف بعد فترة من الزمن .. صار ابوصطيف تاني صار يلبس اغلى كندرة واحلى ملابس وترك الدخان الوطني وتحول الى المالبورو .. وكمان ترك بيته اللي كان مستأجره واشترى بيت مرتب

بعد سنة….
ابو صطيف قرر انه يرجع يشغل مخه مرة ثانية.. وراح لعند ضابط اعلى من الضابط صديقه وطلب نقله الى احد المكاتب الادارية الاكثر حساسية واستراتيجة من ناحية الرشوة ... ودفع مقابل ذلك مبلغ/ 200 الف ليرة ليد الضابط (لا تستغربوا المكان بيستاهل اكتر من هيك )

ابو صطيف يا ما شاء الله… كل معاملة بياخد عليها ما بين الـ 100 ليرة الى 300 ليرة .. وكل يوم عنده ما لا يقل عن 100 معاملة ، بحسبة بسيطة اكتشف انه 100 ليرة ضرب 100 معاملة يساوي 10.000 ليرة

مو قلت لكم انو المكان بيستاهل اكتر من هيك !!، خلال شهر واحد استرجع اللي دفعه للضابط

بعد 6 اشهر…
ابو صطيف عمل حسبة صغيرة ..

( كل شهر ما يقارب 250 الف ليرة × 6 اشهر) صار عنده فوق المليون..

…. الله يرحم ايامك يا ابوصطيف لما كنت ما تعرف شكل ورقة الخمسمية… وكنت تشتهي تاكل سنديوشة شاورما لحمة ام الـ 30 ليرة

ابو صطيف اشترى سيارة اجرة (تكسي) وشغل عليها اخوه.. واشترى سرفيس دفع ثمنه بالاقساط وشغّل عليه اخوه التاني…

ابو صطيف .… من حيث يدري ولا يدري صارت المصاري تكب كب عليه

- نسيت اخبركم انو ابوصطيف طلع له كرش من شي سنة .. ما بعرف من كثر المصاري ولا من الاكل الدسم.. الله اعلم

بعد 6 اشهر كمان…
ابو صطيف فاحت ريحته وبلشوا ينكشوا وراه واستدعوه كم مرة على التحقيق …
ابو صطيف بذكاءه طلع متل الشعرة من العجين..مو قلت لكم انو صار ذكي من ورا المصاري!!

بعد اسبوع…
ابوصطيف قرر انه يهرب وينتقل من المكتب مكان دوامه وينتقل لمكان اخر لانهم مسكوا كم واحد بتهمة تقاضي الرشوة… ومنهم ضباط كمان انشحطوا على التحقيق
ابو صطيف دفع المبلغ اللي فيه النصيب مشان ما حدا يقرب عليه لا من قريب ولا من بعيد وانتقل الى محافظة اخرى…

بعد شهر..
ابو صطيف بعد انتقاله لمحافظة اخرى قام بتوسيع اعماله ودخل بكم مشروع وقام ببناء بيت كتير حلو له في قريته ..

بعد فترة من الزمن…
ابو صطيف سمع انه التحقيق ما زال مستمر .. ويمكن في خطر عليه..
ابو صطيف قرر فجأة انه يقدم استقالته من الشرطة بعد خدمة عشر سنوات… وكمان دفع اللي فيه النصيب حتى يطوى اسمه بالكامل ويسحب من كل التحقيقات التي جرت والتي ستجري لاحقا ...

ملاحظات هامة:

* ابو صطيف كلما رأى القتلى الفلسطينيين على شاشة تلفزيونه الضخم بتدمع عيونه وبيحلف يمين يتبرع بهديك الحسبة لأخوته في فلسطين..

(بس مشكلتو انه بعد نص ساعة بينسى كل شي)

* ابو صطيف بعد كل صلاة جمعة بالجامع بيرمي بصندوق التبرعات ورقة تبع ام الخمسمية..مشان الله يبارك له بنقوده…، مؤخراً سمعت انه ترك صلاة الجمعة لانه بعد ما تعود على سهراته المخملية كل خميس صار يصحى متأخر

الان وحالياً .….
ابو صطيف هذا الشاب الغبي والبليد الكسول اللي رسب 3 سنوات في السابع والثامن والتاسع..
ابو صطيف اللي كان يشتهي ياكل سندويشة شاروما .. وياكل الفلافل وهو مغمض عينه مشان يتخيل انه عم ياكل شاورما..
ابو صطيف اللي اعطيته اكثر من مرة اجرة الطريق مشان يرجع لعند اهله…خلال وجوده في كلية الشرطة..

ابو صطيف صار شغلة كبيرة .. وصار يحكي بالملايين…

ابو صطيف… اليوم اتصل فيني وكلمني بلهجة لا تخلو من التكبر والعجرفة لدرجة جعلتني افكر اكثر من مرة ان اغلق سماعة الهاتف في وجهه.. .. .. اخيرا قلت له ..يا ابو صطيف خير كيف اجى على بالك وتذكرتني..
ابوصطيف قال لي بالحرف الواحد: يا صاحبي سمعت انك بتفهم بالكمبوتر وبدي ابعت لك مصاري مشان تشتري لي كمبوتر عليه برنامج اسمه وندز ابو الاكس  ..هيك شي مدري شو اسمه والله نسيت بس بدي يكون كمبوتر مرتب وياباني اصلي مو صيني لانو بدي حطه بالبيت مشان اتعلم اشتغل عليه وبدي تحطلي عليه اكزل هذا اللي بيطلع جداول ومربعات مشان الحسابات.. انتهى كلام ابو صطيف.

ما راح خبركم شو رديت عليه..

بس تذكرت بيت الشعر اللي بيقول :
ولو لبس الحمار ثياب خز …. لقال الناس ياله من حمار

كانون الثاني 2005

* ابو صطيف شخصية من وحي الخيال.. والقصة لا تمت للواقع بأي صلة.. وكل تشابه بالاحداث او الاسماء او الاماكن هو محض صدفة

 

 

مواضيع متفرقة

• فتوحات
• ايران . . !!
• مذكرات خروف 6
• مذكرات خاروف 2
• ممارسة

الوسوم: شرطي،مرور،رشوة،25

هذه التدوينة نُشرت في الأربعاء, 24 فبراير, 2010 عند 4:32 م و مصنفة تحت تصنيف عام. يمكنك متابعة أي تعليقات عبر رابط RSS 2.0. يمكنك ترك تعليق, أو تعقيب من مدونتك.